![](https://images.prismic.io/orkusalan/d37d2cd1-2a9c-4eff-832e-cefff28ab78a_orkusalan-starfsmannamyndir46.jpg?auto=compress,format&w=3000)
Erling Ormar Vignisson, sviðsstjóri stafrænna lausna
Erling hóf störf hjá Orkusölunni árið 2019 eftir að hafa búið í Svíþjóð í sjö ár. Fyrstu verkefni Erlings hjá Orkusölunni snéru að innleiðingu nýs reikningagerðarkerfis og þróun nýs þjónustuvefs ásamt því að koma á ferlum í tengslum við innheimtuferli ógreiddra krafna. Í beinu framhaldi bættust við mál tengd PowerBI-skýrslum og birtingu gagna ásamt innleiðingu CRM-kerfis sem síðan hefur orðið ómissandi þáttur í starfseminni.
Mörg verkefni Erlings eru einnig unnin í góðu samstarfi við aðrar deildir: „Verkefni tengd vefmálum, sjálfsafgreiðslu viðskiptavina og þjónustuferlum eru unnin í góðu samstarfi við markaðssvið; samþætting kerfa, sjálfvirknivæðing og rekstur reikningagerðarkerfis eru verkefni unnin í samvinnu við fjármálasvið. Auk þess kem ég að samningagerð við þjónustuaðila og tek þátt í málum tengdum breytingum á regluverki á raforkumarkaði, umsögnum og vinnu við breytingar á viðskiptaskilmálum í takt við breytingar og aukið þjónustuframboð Orkusölunnar.“
Síðast en ekki síst hefur hleðslustöðvaverkefnið Heimastuð verið fyrirferðarmikið í þróun síðustu misseri og má því segja að Erling hafi mörg járn í eldinum.
![](https://images.prismic.io/orkusalan/50485bd8-7b39-4401-841c-fb356327902d_orkusalan-starfsmannamyndir20.jpg?auto=compress,format&w=3000)
Hvað gerir Orkusöluna að góðum vinnustað?
„Orkusalan er ekki stórt fyrirtæki í starfsmönnum talið, en sinnir meira en 30 þúsund viðskiptavinum með nauðsynjavöruna rafmagn. Mér finnst stærðin spennandi þáttur, en sú staðreynd að boðleiðir eru stuttar og ákvarðanataka getur verið hröð: tvíeggja sverð sem er öflugt vopn en þarf að nota með gát,“ segir Erling.
„Bókfærðar eignir í eigu Orkusölunnar eru vissulega mikils virði, en fólkið sem vinnur hjá Orkusölunni er ekki síður mikils virði. Við hjálpumst að, erum gagnrýnin á eigin störf og meðvituð um hvað og hvernig gera megi betur. Oft er kapp við tímann og mörg járn í eldinum sem fylgja örum vexti Orkusölunnar, sem er spennandi að vinna með fólki sem leggur sig fram við að skila góðu verki,“ segir Erling
![](https://images.prismic.io/orkusalan/b776d2e5-3b1d-49f1-b44a-7ab0dc814add_DSC09184.jpg?auto=compress,format&w=3000)
Hvað er stuð fyrir þér?
„Stuð er orkan sem við sækjum hvert frá öðru, andrúmsloftið á vinnustaðnum og krafturinn sem liggur að baki vörumerki Orkusölunnar,“ segir Erling sem leggur mikið upp úr því að hafa gaman í vinnunni og er þekktur fyrir að taka vel í allt stuð.